اجمل كلام في الوطن السودان , اجمل واروع ما قيل عن بلدنا السودان

*HOB* · #1

اجمل كلام في الوطن السودان , يلا يا تاريخ اقيف واسمع معاي وابدا الكتابه

تحميل صور مكتوب عليها وطني السودان

انا السودان جمال اشراق وعيديه
انا السودان بضي شمسو النهاريه
انا النيل الصحي بوافي بغني مع المراكبيــــه
انا عيون المها الضوت تحاكي الطلعه ورديه
انا السودان جمال في لوحه صوفيـــــــــــــــه
روائع دنيا للاطفال بيعيشوا نشئه دينيــــــــه
اغاني الفرحه لي وطننا تزف في ليله قمريه
انا السودان علوم وحضــــــــــــــــــــاره
صحوة غضبه زنجيــــــــــــــــــــــــــــــه
بيجري في دمي حس عربـــــــــــي
ونفوس بالتقوي مهديــــــــــــــــــــــــه

اجمل ما قيل عن السودان

اجمل ما قيل عن السودان

اليوم نرفع راية استقلالنا

اليوم نرفع راية استقلالنا
ويسطر التاريخ مولد شعبنا
يا إخوتي غنو لنا اليوم

يا نيلنا ..
يا أرضنا الخضراء يا حقل السنا
يا مهد أجدادي ويا كنزي العزيز المقتنا
يا إخوتي غنو لنا اليوم

كرري ..
كرري تحدث عن رجال كلأسود الضارية
خاضو اللهيب وشتتو كتل الغزاة الباغية
والنهر يطفح بالضحايا بالدماء القانية
ما لان فرسان لنا بل فر جمع الطاغية
يا إخوتي غنو لنا اليوم

وليذكر التارخ أبطالا لنا
عبد اللطيف وصحبهو
غرسو النواة الطاهرة
ونفوسهم فاضت حماسا كالبحار الزاخرة
من أجلنا سادو المنون
ولمثل هذا اليوم كانوا يعملون
غنو لهم يا إخوتي ولتحيا ذكرى التاريخ
يا إخوتي غنو لنا اليوم

إني أنا السودان أرض السؤد هذه يدي
ملأى بألوان الورود قطفتها من معبدي
من قلب إفريقيا التي داست حصون المعتدي
خطت بعزم شعوبها آفاق فجر أوحد
فأنا بها وأنا لها
وسأكون أول مقتدي
يا إخوتي غنو لنا اليوم

وطني قلبك وقبل قلبك ولا غلابه

يلا يا تاريخ اقيف اسمع معاي ابدا الكتابه
طوف بلدنا من البدايه وللنهايه

من شروقا ولا غروبا من شماله ولجنوبا

كل قريه كل مدينه تلقى بلدي على الهدايه

تلقى في اللوح والدوايه في ترانين راعي بمزمارو يعزف وحولو سرحات السعايه

يلا يا تاريخ اقيف اسمع ومعاي ابدا الكتابه

تلقى في الدوبيت وقت يحلى ويشق اليل مع ناس مهوي ليل فوق ضهر المطايا

يا سماحه بت بلدنا الفي المكاتب وفي المصانع وفي الفصول بهمه شاغلاها القرايه

يلا يا تاريخ اقيف واسمع معاي وابدا الكتابه

وطني سك سك لابسه مريم وفي اضان كلتوم فدايه وفي حنان ام مقالدي وليده في لا ولا يا تقولو ان شاء الله تكبر يا جناي

في كلمة الطيبه كلمة وا شريري وجيت من وين يا جنايا

في حنين اهلي الغبش اهل الدباره واهل الدرايه

ويلا يا تاريخ اقيف واسمع معاي وابدأ الكتابه

وطني الطيبه والاخلاق وقيد للرجال خناق وطني كرم يوشل مي سحابه

ياهو مننا ويانا منو ولا غلابه ولا غلابه

يلا يا تاريخ اقيف واسمع معاي وابدا الكتابه

قصيدة انا سوداني انا

كلُ أجزائه لنا وطنٌ
إذ نباهي به و نفتتنُ
نتغني بحسنه أبداً
و دونَه لا يروقنا حسَنُ
لو هجرناهُ فالقلوبُ به
و لها في ربوعِه سكنُ
حيث كنا حدتْ بنا ِذكرٌ

ملؤها الشوقُ كلنا أمِنُ

نتملّي جماله لنري
هل لترفيهِ عيشه ثمنُ
غير هذي الدماء نبذلها
كالفدائي حين ُيمتحن
بسخاءٍ بجرأةٍ بقوي
لا يني جُهدُها و لا تهن
تستهين الخطوبُ في جَلدٍ
تلك تنهالُ و هي تتّزن *** ***

أيها الناسُ نحن من نفرٍ
عمّروا الأرض حيثما قطنوا
ُيذكر المجد كلما ذُكروا
و هو يعتز حين يقترن
حكّموا العدل في الوري زمناً
أتُري هل يعود ذا الزمن
ردد الدهر حسن سيرتهم
ما بها حِطّة و لا درن
نزحوا لا ليظلموا أحداً
لا و لا لإضطهادِ من أمِنوا
و كثيرون في صدورهمو
تتنزّي الأحقاد و الإحن
دوحةُ العُرب أصلها كرمٌ
و الي العُرب تُنسب الِفطن
أيقظ الدهر بينهم فتناً
و لكم أفنت الوري الفتن

*** ***

يا بلاداً حوَت مآثرنا
كالفراديس فيضها مِنن
فجّر النيل في أباطحها
يكفل العيش و هي تحتضن
رقصت تلكم الرياض له
و تثنّت غصونها اللدن
و تغني هزارُها فرحا
كعشوقٍ حدا به الشجن
حفِل الشيب و الشباب معا
و بتقديسك القمين عُنوا
نحن بالروح للسودانِ فداً
فلتدم أنت أيها الوطن
أنا سوداني أنا
أنا سوداني أنا

بلادي
******
بلادي أنا
بلاد ناسا في أول شئ
مواريثهم كتاب الله ،
وخيل مشدود،
وسيف مسنون حداه درع،
وتقاقيبهم تسرج الليل مع الحيران
وشيخا في الخلاوي ورع
وكم نخلات تهبهب فوق جروف الساب
وبقرة حلوبة تتضرع وليها ضرع ،،،
وساقية تصحّي الليل مع الفجراوى..
يبكى الليل ويدلق في جداولو دمع
يخدر في بلادي سلام ..
خدرة شاربي موية النيل ..
تزرد في البوادي زرع
بلادي أنا بتشيل الناس وكل الناس
وساع بخيرها لينا يسع،
وتدفق مياه النيل علي الوديان
بياض الفضة في وهج الهجير بتشع،،،
بلادي سهول ،،بلادي حقول،،
بلادي الجنة للشـافوها ،أو للبرة بيها سمع ،،
بلادي أنا بلاد ناساً تكرم الضيف
وحتى الطير يجيها جيعان
ومن أطراف تقيها شبع ،،
بلادي الصفقة والطنبور ،،
وبنوتاً تحاكي الخيل
،يشابن زيي جدي الريل،
وشبالن مكنن في طريفو ودع ،،
بلادي أمان ،،بلادي حنان،،
وناسها حنان ،يكفكفوا دمعة المفجوع ،
يبدوا الغير علي ذاتهم ،
يقسموا اللقمة بيناتهم ،
ويدوا الزاد ،حتى إن كان مصيرهم جوع ،
يحبوا الدار ،
يموتوا عشان حقوق الجار ،
ويخوضوا النار عشان فد دمعة ،،
وكيف الحال كان شافوها
سايلة دموع ؟؟،،،،
ديل أهلى..
البقيف في الداره 00 وسط الداره00
وأتنبر وأقول للدنيا ديل أهلي
عرب ممزوجة بي دم الزنوج الحارة..
ديل أهلي
ديل قبيلتي00 لما أدور أفصل للبدور فصلي..
أسياد قلبي والإحساس
وسافر في بحار شوقم زمان عقلي
أقول بعضى..
ألاقيهم تسربوا فى مسارب الروح بقو كلي
محل قبلت ألقاهم معايا00 معايا زي ضلى
لو ما جيت من زي ديل..
كان 000أسفاي..
وآمأساتي..
وآذلي..
تصور كيف يكون الحال
لو ما كنت سوداني وأهل الحارة ما أهلي
تصور كيف؟

بنحب من بلدنا..

كلمات الشاعر الراحل/ أبو آمنة حامد
الحان/ محمد وردي..

بنحب من بلدنا
ما برا البلد
سودانية تهوى عاشق ود بلد
بعيون المفاتن شي ما ليهو حد..

التوب المهبهب فوق أم الضفاير
والخد المعطر زي أحلى الأزاهر
والخطوة الأنيقة ترنيمة مشاعر
أنا بي كلو عمري بمشيلا وبسافر
مين في الدنيا دية أجمل من بناتنا
الليهن قلوبنا والفيهن صفاتنا
الكامنات في روحنا والعايشات في زاتنا..

في حلفا البداية أحلامي وهنايا
أنا عايش لحبي المخضر برايا
النافرة الأليفة بجروحي وهنايا
أنا لي في كريمة شايقية بشلوخا
نعتز بصفاتا ما نجهل تاريخا
ماها المابية ريدتي ومو ياها المسيخة..

في شندي العظيمة تلقى بنات جعل
وحدات في المتمة زي لون العسل
النايرات خدودن زي فجرا أطل
في سنكات بنعشق بت سمرة وأبية
ترتاح في الضريرة خصلاتا الغنية..

عاشت في شعوري أحلى هدندوية
الواردات جدودن في الجود والشجاعة
البظهر جمالن من زمن الرضاعة
سودانية مية المية في زوقا وطباعة
يا ناس أرحموني أنا قلبي فرطاعة ..

لو تلقطنا اليانعة السمحة ونضيرة
تستنى الحليوة في مشية أميرة
أجمل حب عندي في قلب الجزيرة
لي في الغرب أغيد في دار حمر والبقارة
نحميها بسيوفنا تفاحنا ونضارة
تسكرنا الليالي وتطربنا النقارة
لي في جوبا الساحر تسلم لي خدودو
يمرح في غاباتو يسرح في ورودو
حبي الغالي ليهو ما بعرف حدودو..

مسكين أنا

ومسكين أبوى

مسكينه أمى..وبرضه أختى

كمان أخوى

لكن - ورغمَك يا شَقَا-

بَرضُه راكزين زى بَلد

الليل سَرَحَ فيها ومشَىَ

وسَاوم عيونها وحَنَّسَها

ولا اتبَدَلت..لا استسلمت

مسكين أبوى

ضامِر مِتِل عوداً نِشِف

ومسكين أبُوه

السَّلَّ سيفو على المدافع

وصاغ صباح مليون حَرِف

ومسكينة أمى

الما غِشَت درب الكتابة

لكنها

ساعة الحريق الشال عُمُر

ناساً عُزاز نصروا الغلابه

عِرفت تَخُط حرفين كبار

رَسِمُهم حِلاَ

ولاَ مِن لَمَع لون الحِبِر

كل البلد صِبحَت دروب

مكتوبه لا

تَعَب حُرُوفها

ضِحكت عيونها

كلام أكيد قالوه غيرى

ودايِر اقول ابيات جديده.

وشان أطوّع للحروف

العارفها مرات عنيده

ساهرت زى قطرة مَطَر

فىجناح سحابة.

وقلت يا أقدر أقول أوصافى فيها

او أصوم من الكتابة.

حاولت أرسُم ضَحْحَتَها

كل ما أحَنِّس فى الحروف

ألأقاها تابى

حاولت تانِى

بديت أعيد رسم الحروف

إصرارى!؟..لا لا

ريدى ليها الطاغى جابها

وفرحت لاَ مِن دمعة رَقَشَت

وخُفتَ تنزل

وللخطوط تَمسَح تَبَدل

وَقَفتَ حيلى بعيد مشيت

قَبَّلتَ تانى رجعت جيت.

زِدت الخطوط عايَنْت فيَها

لقيت نجم شَعّ وْحَضَن

وردة بَنَفسج جوّه غابة.

وكلمة احبك فى الفروع

مكتوبة بى صدق الغلابة.

وكوخ مَحَكّر فى القمر

قلبى البِرِيد لى بابه شابا

وفكرت تلت الليل أفسّر

وين جمال ضحكة عيونها

وين؟وين؟ وهل..؟

وهل أحرف كلامى الفيها دونها؟

وحاولت تانى

ومن جديد سِخَت الحروف

زدت الخطوط اكتر كمان

بَسَمت عيون السمحه من وسط السطور

وشوَيّه من الدايروبان.

وبديت أزيد... ومرات اعدِّل

ولما ألقىَ وَصِف جديد

أفرح واقيف فى الساحه أقدِل

وفى النهاية لقيت عيونها.

والبَرِيق الزى شموس حَاضِن سنونها.

والخدود والجيد... وخصلاتها

البِزِيد غزل النسايم فى جِنونها

كلهن ضاحكين بتَاوقوا من القصيدة

إلإ آه أنا من حروفى الفيها عاجزة

كل الكتبتُه محال يكون أبيات جديدة

محال يكون أبيات جديدة

مقالات ممكن أن تعجبك :

المصدر: الإبداع الفضائي - من قسم: شعر - خواطر - قصائد - حكم - اقوال - بوستات